وخلعتُ ذنبيْ وجئتُ غيرَ منتعلِ

أنّي ببابِ أميرِ المؤمنينَ علي

ضاعتْ خطايَ ودبَّ الحبُّ في شفتي

خوفاً رجفتُ وضاعَ الحرفُ بالجملِ

قبُّلتُ باباً وخرًّ الدمعُ فاختَلَطا

من فرطِ ناري سماءُ الدمعِ بالقبلِ

أشكو أليكَ بلادَ العُربِ كيفَ غدت

من أمةِ العُربِ صارت أمةُُ الدجلِ

حرقوا العراقَ وباعوا الملحَ واغتصبوا

سترَ النخيلِ ولاذَ السعفُ بالخجلِ

قتلوا الطفولةَ بالرصاصِ وفاتهم

إن الفراشة قد تغتالُ بالقبلِ

يا ليتها حطباً تحمله من غدِها

وقفتْ  ببابي وحلَّت عقدةُ الوجلِ

جاءتْ تشدُّ حزاماً وانبرى شُعلاً

بالجمرِ وانفجرتْ حمالةُ الشعلِ

كبر جمر العراق وشربته الروح

لحد ماطلع ويه الونه عطاب

العرب گلنه على جروحه يطيحون

واجو بس طاحوا اعله جروحه تيزاب

فرق بينك علي وبين العرب وين

فرق ضحكة بطر عن شوغة اصواب

وزغرنه بغيبتك شربتنه الايام

وكبرنه وخضرينه بكل جرح باب

نجيب منين مثلك يابو الحسين

حرير الدنيه عنده وظل ابو تراب

ايا رمحا كسر صدر المعاناة

وايا سيفا حشه يغطيك الگراب

ويبو العباس طفوا بينه الشموع

بكثر ماخضرت ياسيدي شموع

وچان السيف بيدك يشرب الليل

وچان رغيف جفك ياكل الجوع

ومن گد ماتذوب بحب الايتام

خلصت الخلافه تنشف دموع

الجبين المايشيلك گطره مابيه

وجبين الشايلك شايله ينبوع

ومثل ماشال گبرك شلته مولاي

وبقه راس العراق لهسه مرفوع

علي وشگد بچيت عله اليضحكون

بكثر ماكسروا من عدكم ضلوع

ثقافتهم شمع شتقاوم وياك

يبو عقل الشمس گدامك تموع

أجو يقروك بس ماعرفوا شلون

برغم ماجان وجهك أرقه موضوع

كل ظنهم ذهب من راسك يسيل

وفتحوا باب راسك وانچفه الجوع

علي ومن سافرت طلعوا يشيعون

الفقره  المستحه البيبان الشموع

ودمعه عله النهر وگفوا بلياك

شيردهم بعد والمجره مگطوع

بقه وجهك وياهم  يذبح الخوف

وعله كل سنبله يشوفونه مطبوع

وچانت كالبرق تنزل عله الروس

الساعات  الثواني ايام الاسبوع

نجيب منين مثلك للمساكين

الجوع يگطِّعَّك وتخضر شموع

ونجيب منين مثلك قائد انسان

ذو الفقار بيده وثوبه مرگوع

دورّنه العرب   مجرور منصوب

ولابيهم المثلك لله مرفوع

ميثاق الهلالي

لاتمسح دموعي شعندك وياهن

سولف غيرهن ذنّي افتهمناهن!

عله هذا الخذاك احچيلي يفهم بيك

واستوعب رموشك عرف معناهن؟

شلته ابينهن والچان بيهن طاح

ذبّيته الگبل بعيونه خلاّهن!!

چا من شلته منهن ماحسبت يموت

ذاك الگالك ماعيش لولاهن؟؟

البداك اعله روحه بلحظه تغدر بيه

البداك اعله روحه سنينه بدّاهن!

المهم سولفلي عن هذا الجديد شلون

من يشرب عيونك يسكر وياهن؟!

تهجّه حروف خدّك واللغه البشفاك

لو صعبن عليه ماگدر يقراهن؟؟

عله صدرك حظنته وسلّمت وياه

تبدّن بين اديه والشعر غطّاهن؟

يخجل مثلي لو كلّش تماده وياك

الماسوّيتهن ويّاك سوّاهن؟؟

سترت الذكريات بخانة النسيان

خو مافرّعن وانجاب طرواهن؟

خاف يشم عطر من عندي عالقمصان

شد عيونهن واغسل خطاياهن..

ماعاتب بعد شيفيد بيك اعتاب

المافادن گبل هسّه اترجاهن

تره هنّه الوفه والصدگ هم صعبات

يگدرهن ردي وغدّار حاشاهن

لاتسال شموعي شلون اخذهه الليل

مومسألة ليل فراگ طفّاهن..

السنابل هيچ من فارگهن الفلاّح

طيّح روسهن وتراب خلاهن

ولاتحسدني هنه البقن بس ضحكات

باچر ينتهن وتموت ذكراهن

مرّات الطيور يغنّن من الظيم

فك باب القفص دمعات تلگاهن..

عن ياهن احچيلك قسوتك فرگاك

بياهنّه ابتدي واختملك بياهن!

ماتذكر ابّابك من وگفت شلون

اسولف والجدام اتعارك وياهن

وشفت چفوفك اللوحن بالله وياك

هيچ بهالسهوله وگلبك انطاهن!

ماتن كل صورّك بيدي من رديت

وانه وصفنتي اصورّك رثيناهن

انه وجفني ادْمَنّه الدمع والليل

عشرة عمر ومن الصعب ننساهن

شرجعلك محطات الورود تموت

اذا شافن قطار النده اتعداهن..

ارجع والسنين وعمري المصلوب

وجروحك برگبة من خطاياهن؟!

گتلك كلشي اتحده القصور اطيح

وقصور المشاعر مااتحداهن..

انت بلاوعي وهدّمت بيه قصور

وانه بلاوعي وهدّمتك وياهن

صرت بلاوعي وهدّمتك وياهن

ميثاق الهلالي

النوارس

موبكد الجرح لاتسأل عليه

وياجروح تهزك من احجيهه!!

فشلة عيوني عمت  لو عمري ضاع

لو دموعي الگبل ماباچيهه

آخ لو بس ترجع ايامي هذيچ

چا هدمت أحلامك البانيهه

وچان رديت الدموع عله الجفون

ولو تموت كبالي مابديهه

وخاف ترجع بعد تضحك عالغشيم

شموع ضحكاتك يكون أطفيهه

لكن شترجع بعد والراح راح

وحته لو ترجع رخص غاليهه

ياسفن لشواگ صارت ذكريات

ويّ النوارس تيّهت شاطيهه

وياعمت عين الجرح لوحن عليك

جروح تحني الراس ماخليهه

كبل شلتك حلم بعيوني شجاك

تصيرخنجر بالحلم تعميهه؟؟

أمنتني شموع بالنار ومشيت

شتظن باچر من ترد تلگيهه

صورخوف أبالي ظلت من مشيت

الموت يخطف من يمر طاريهه

وكف حته الوكت بيه وكمت اشوف

الساعه ميته وميلهه يجر بيهه

ذابله عيوني وردت ليلك يفوت

وفات ملحك واشتهه يجويهه

تكطعت بيناتنه كل الجسور

الضفه عالضفه العمه يدليهه

گبل طاحت دمعتي بس مو اكيد

باچر يجوز استعز انطيهه

الدمعه مهره وتعرف الخيال زين

وهسه دمعاتي تعرف راعيهه

لاتسولفلي عله جرحك عمري ضاع

الجرح يشفه سنيني وين الگيهه

تبچي چي مايك تبده عله السراب

انه روحي لخاطرك چافيهه

كون مو گد الهوه شجابك عليه

چفوف مو يمك شكو تلاويهه

لاتبرر ذبلت الورده  بديك

انت موگدهه الشمس شعليهه

ورده ماتت المن ترشلهه ماي

وهذا ياهو الگالك تحييهه

صرت كتّالي برگبتك دمّي صار

وذيچ روحي بذمتك خليهه

سالفه العاف القفص يرجع عليه

شعنده راجع بعد لاتحجيهه

انه ردتك لمن چانت بيه روح

ترجع المن بعد روحي شبيهه

التفگه المكتره بساعات الثگال

فشله من يگضن تجر سرگيهه

ولاتعيرني الجرح غير انت هاذ

    انه لو اعرف جروح اشريهه؟!

تطيب لومهما تمر بيهه السنين

جروح المسودن شمس تجويهه

ماتدوم وداعتك يوميه راي

بدمعه وبضحكه السنين أكضيهه

شالتك دنياك بس باچر اطيح

وترجع تسحگك سحگ رجليهه

مثل طبع الگاع مره تموت خوف

ومره يصعد للشمس برحيهه

شوف وين وياك وداني العتاب

خل ارد السچه ماماشيهه

وهيه تصفه شلون مو شغلك هذاك

روح عني وربك يصفيهه

ميثاق الهلالي

7\4\2010

http://www.4shared.com/audio/r2l37nJA/__online.html

http://www.4shared.com/account/file/140787971/c0e164b7/__online.html

http://www.4shared.com/file/137965835/42732f90/__online.html

ناي بليله تنزف نغمة وداع

أشتهيتك وانچفت حفنة سوالف

صبح ضحكاتك وليل الدمع ذاك

وحياة عيونك وموت الشفايف...

أنه بطور الخريف وغيبتك ريح

بغصن ذبلان شتسوي العواصف؟!!

وعمر تانيت طيفك ياخذالعين

وردت صوتك يمر..ومرني خايف

فرق مابين صوتك واليكرهوك

فرق السجن وگلوب المضايف..

بعدني أذكر ضحكتك وأذبل فراگ

ولهسه بّاب صوتك عقلي واگف.

عود الناس مثلك تهمس وياي

أخلافك كلهن اسمعهن قذايف!..

بطرگ ساتر غيابك مابقه سلاح

الحچي ينزل رصاص وآنه اشاگف=

بديه   وينتهي دور البطولات

وتخطف ذكرياتك والسوالف...

وأحن لكلشي بيك وكلهن ثگال

صوتك  عينك  أسمك  والشفايف..

لطفولتنه لدمعنه لكلشي حنيت

لبساطتنه لذهب ليل الصرايف..

لحچايات أهلنه لبيض الگلوب

لسياسة مستحه تحل المواقف

الچانوا عنك يگلولي أنساه

وأگلهم مايخالف   حته أخالف...

أنسه شلون وانت بجرحي مرسوم!

شما يبچي الجرح تنزل عواطف

شگد جروح تنزف بيه وتموت

بس جرحك كتلني وبعده نازف ..

وگبلك شايف وعايف عصافير

بس من شفتك ولاچني شايف

چنت چم مره تخطف خطفة الريل

وين الله وتظل هالمره واگف..

خلافك تايه مسافر بالوجوه

شكثر صاحو وراي ومااوالف

وشگد حاولوا بس مادرت بال

شلون ألتذ بغيرك وانه حالف!!

ألك ضميت كلشي شفافي والناي

خاطر من تجي توّن الصرايف..

وعله أطراف المدينه أزرعلك عيون

وتمر وتشوفهه تبچّي  المشارف

ولو شمسك طفت بس راح أتانيك

وأضم دفتر جروحك والمصاحف..

وّلو لمن تجي حاسبلك تروح

وأموت بروحتك بس راح أجازف .

ياهو الگالك خلصت سلامات!

وياهو الگالك صارت سوالف!!

من شوغة حزن لحچاية وداع

(صرتلك سالفه بحلگ الطوايف)

وصرت لوحة جرح من خنجرك ذاك

وّلاغربه اشترتني ولامعارف

صرت لوحة جرح بالنزف ماطار

و مثل طرّك بگلبي السيف ماطار

أنكسر جنحي بعد لتخاف ماطار

بقفص.. بره القفص.. نفس القضيه

ميثاق الهلالي

القصيدة

مع الحب

http://www.4shared.com/file/109064239/751ac7e/___.html

الگصب لو يبس يكسر واهس الماي

وأحنه بلافرح وندور بليل

گضينه الفرح بس بطرگ الشموع

أعله طور السوگ يغفن بينه الجروح

ويردبينه بوذية داخل يصيح

ولو لو صاح جن گلبك يشلعه

مثل نخله أرد أشبلك ون عراقي

يبست..وأنعه شطي ونعه راقي

تعال آنه أرد أون لك ون عراقي

وعراق أستهلكن كل المواضيع

أشوف الدمع فوگ خدود الأيتام

أنه رايد سياسي يسولف وياي

وأريد اليندل جروح الوطن وين

وأريد العينه تشرب دمع الأيتام

وأسولفله عله نص القطعه الأيجار

وعله أم الشهيد أحچيله من راح

ببوذيه ودمع گضتهه تنعه

أياطعم الشهد بشفاي مروك

وراكوا فوگ گلبي روك مروك

خذوك گبال عيني وعلي مروك

وماريد التقاطع دوّخ الناس

تقاطع صار عدنه بكل الأفكار

وأريد بيوت للماعدهن بيوت

وأريد الماي يشغل حيّز النار

وببوذية العيد تسولف روح

جرح..دمعه..إبتسامه بكلشي قانع

وشقنع العيد هو العيد بطّال

وشكضه بياهدم بالگصر بطّال

أنه مگضي العمر عطال بطّال

وغير وداع شتودي المحطات

شقبضنه من السواتر غير الجروح

وفتحنه عله الشمس بيبان العيون

رادوا بس نضيع وداخوا شلون

نضيع شلون وأحنه أهل المحطات

نعم طحنه گبل بس تعرف شلون

نطيح چفوف يم شباچ عباس

ميثاق الهلالی